Nachrichten und Veranstaltungstipps / nowosći a pórucenja

Veranstaltungstipps/Kulturne pokazki: 10.02.2012

Z tłocenim palcow dejmy něnto južo zachopiś za našo łužyske balokopańske mustwo. Energija Chóśebuz co, dej a musy źinsa dobyś. Jo to prědne graśe doma we wrośnej runźe drugeje (2.) balopopánskeje zwězkoweje ligi. FCE wótcakujo Alemannia Aachen. Zašwicanje buźo źinsa wjacor zeger šesćich (18 g.) w Chóśebuskem stadionje pśijaśelstwa.

Romantisku noc pód gwězdami mógu Wam źinsa wjacor w Chóśebuskem planetariumje w Žandowje pórucyś. Zeger wósymich (20 g.) buźo Wam eksperta zymske njebjo pokazaś, potom dožywijośo gwězdowu bajku a koncert z romantiskimi spiwami.

Lěcrownož jo nowe lěto južo šesć (6) tyźenjow stare, kśě Strjažowarje źinsa wjacor hyšći raz slědk glědaś na to stare. Woklapnica se zachopijo w swěźeńskem stanje na Strjažojskem sportnišću źinsa wjacor zeger sedymich (19 g.).

W Strjažowje buźo witśe ale teke camprowanje. Ale to planuju za witśe teke Slěpjanarje, Trjebinarje, Popojcarje, Kosobuzarje, Bobowarje, Dešankarje a wejsanarje na Lědach, w Radušu, na Górach a w Dalicu.

Brjazynarje swěśe ale witśe južo zapust ze swěźeńskim pśeśěgom – tak ako njeźelu teke w Strjažowje, w Kosobuzu, w Myšynje, w Běłej Górje, w Turjeju, w Kozłem a nic naslědku w Žylowje, źož buźo sto pěś a pěśźasety (155.) zapust.

Co wšykno wuměju a pórucyju naše rucnikarje? To pokazuju wóni na wjelikich rucnikarskich wikach w Chóśebuzu. Jo to južo tradicija na zachopjeńku kuždego lěta, až su w měsćańskich wikowych halach kóńc tyźenja rucnikarske wiki. A tomu buźo witśe a pśezwitśe zasej tak. Wót źaseśich až do šesćich (10 – 18 g.) su źurja wótcynjone.

Dolnoserbski gymnazium jo lětosa jubilaŕ. W septembrje swěśi serbska šula 60-lětny jubilej. Za to jo planowany wjeliki jubilejny swěźeń, na kótaremž dejtej se rejowańska kupka a chor absolwentow prezentěrowaś. A wšykne, kótarež kśě tam sobu gótowaś, se zmakaju witśe wotpołdnja w gymnaziumje, aby probowali. Rejowańska kupka witśe wótpołdnja zeger dweju (14 g.) a chor zeger tśich (15 g.).

Wětošowaŕ Gottfried Peschel wugótujo witśe we Wětošojskej serbskej cerkwi klawěrny koncert. Prědne zuki na njom zaklince witśe wótpołdnja zeger styrich (16 g.).

Mjazynarodny program jo za witśe wjacor pśigotował kulturny dwór w Lubnjowje. Muzikowe kupki z Litawskeje, Italskeje a Nimskeje kśě z Wami rockowaś pśez noc. Prědna kupka zachopijo z koncertom witśe wjacor zeger źewjeśich (21 g.).

Źaseś, dwaźasća abo teke tśiźasća (10, 20 oder 30) kilometarjow gnaś, drogowaś, wandrowaś abo walkowaś – to móžośo njeźelu w Bórkowach. Wuběźowanje z nimskim titelom „Frostwiesenlauf” se zachopijo njeźelu dopołdnja zeger jadnasćich (11 g.) w bliskosći hotela „Landhotel”. Wěcej ako pěśstow (500) sportlarjow jo se južo za to pśipowěźeło.

Wam jo kazane njeźelu na serbsku namšu do Wjerbna. W bliskosći wejsneje cerkwje – w domje za sotšy – se zachopijo namša wótpołdnja zeger dweju (14 g.).