Nachrichten und Veranstaltungstipps / nowosći a pórucenja

Powěsći/Nachrichten - 23.05.2012

W Chóśebuskem Humboldtowem gymnaziumje jo se źinsa dopołdnja pócesćiła rědownja 9 b Dolnoserbskego gymnaziuma z 1.městnom połudnjoweje Bramborskeje we zwězkowem rěcnem wuběźowanju.
Wukniki teje witaj-rědownje su nawjerśeli 12minutowy film w engelskej a serbskej rěcy wo drogowanju amerikańskego Serba do swěta serbskich powěsćow.
Stakim se wobźěliju teke na rěcnem wuběźowanju pśiducy mjasec w Düsseldorfje.

W Chóśebuskem Dolnoserbskem gymnaziumje jo cora wobradowało pśedsedarstwo Maśice Serbskeje. Tam stej wjednica gymnaziuma Anke Hillowa a ceptarka Antje Kellowa cłonkam pśedstajiłej profil swójogo dwójorěcnego kubłanišća.
Po tom su napisali cłonki pśedsedarstwa protestny list pśeśiwo skrotcenjam za witaj-projekty w Bramborskej.

Zakładna šula w Dešanku swěśi rowno 100.jubilej swójogo wobstaśa. Dla togo su wuknice a wukniki cora dožywili wósebnu šulsku góźinu nimšćiny – tak ako pśed 100 lětami. Wóni njejsu směli se rozgranjaś we wucbje, wóni su musali se pokazaś a wótegroniś su musali w cełej saźe. Gaž nic – pón su musali stojaś pódla šulskeje ławki. Za źiśi jo to było wótměnjate – něco drugego – ako su pótom gronili.

W Trjebinje jo něźi 45 dworow tak wot wugla pótrjefjonych, až deje se pśesedliś.
Až doněnta jo 9 z nich južo do nowych domow zaśěgnuło. Dalšnych 6 jo rowno psí tom, sebje nowy domicil twariś. Wětšy źěl wšych pótrjefjonych buźo hyšći lětosa pśeśěgnuś.
Żedne z nich pak budu gmejnu teke wopušćiś a młoge starše luźe su se rozsuźili za to, najmjeś bydlenje.

50 drogow a sćažkow we Wětošowje dej se wupórěźaś. Dokradnu lisćinu jo gospodarski wuběrk wuźěłał. Až do lěta 2015 deje wobnowjone byś. Za lětosa co błośańske město za wuporěźańske źěła hyšći wušej 43.000 € wudaś. We Wětošojskem měsćańskem źělu Raduš jo to ned wěcej sćažkow, kótarež su w špatnem stawje. Dalšna droga jo mjazy drugim ta mjazy Zušowom a Tšadowom.

Bramborska a Sakska cotej se zgromadnje staraś wo lěpše wuwiśe Łužyce. To su wobzamknuli cora zastupniki wobeju zwězkoweju krajowu na zejźenju w Grodkojskem měsćańskem źělu Carna Plumpa. Pśi tom źo wó wužywanje domacneje brunice, rozšyrjenje turistiskego regiona w jazorowej krajinje a zwězanje do seśi wobchadnych drogow pśez granice zwězkoweju krajowu.